Бүгүн сэтинньи ый 23 кунугэр биһиги биир дойдулаахпыт, саха норуотун тапталлаах ырыаһыта, самодеятельнай композитор, Саха республикатын уонна РФ культууратын үтүөлээх үлэһитэ, «Амма Чэчирэ» ансаамбыл төрүттээччитэ Ольга Петровна Иванова — Сидоркевич төрөөбүт күнэ. 89 сыл анараа өттүгэр Соморсун нэһилиэгэр, Арыылаах алааһыгар күн сирин көрбүтэ. Кини ийэлээх аҕатын тапталын сэрии ыар тыына хаарыйыар диэри билбитэ.Аҕа дойду сэриитэ Ольга икки баар суох күндү дьонун илдьэ барбыта, сааһын тухары сүрэҕэр оспот бааһы хаалларбыта. Ыал соҕотох оҕото төгүрүк тулаайах хаалбыта. Олох ыар күннэрин Ольга 10 сааһыгар ааһан сүрэҕэр кытаанах, ыарахаттартан чугуйбат эр санаалаах улааппыта.Ол иһин кэлин олох долгуннара ыарыылаахтык охсор түгэннэригэр кэннинэн хаһан да чугуруйбатаҕа, төттөрүтүн туруоруммут сыалын-соругун ситиһэргэ дьулуһара.

Ольга Петровна ырыалара киһи ис санаатын, үөрүүтүн, хомолтотун, иэйиитин таба этэр буоланнар уйулҕаны хамсатар, дууһаны чэпчэтэр ураты дьоҕурдаахтар. Хас биирдии киһи өйүттэн, сүрэҕиттэн сүппэт дьикти алыптаах күүстээхтэр, ол иһин уһун үйэлээхтэр.