Сэтинньи 25 күнүгэр күнүс 14.00 чаастан Амматааҕы Ф. Потапов аатынан норуот айымньытын дьиэтигэр “Радуга творчества” диэн ааттаах быыстапкаҕа О.П.Иванова – Сидоркевич олоҕун, үлэтин кэпсиир архивнай материаллар, куруһуоктар оҥоһуктара, ситиһиилэрэ турдулар. Ольга Петровна кыыһа В.Г.Шилова ийэтэ кэппит сценическэй былааччыйаларын уонна хаһыакка тахсыбыт ыстатыйаларын, эҕэрдэ суруктары дьон көрүүтүгэр таһаарда. Бастакы дириэктэрбит Е.И.Тимофеева быыстапкаҕа бэйэтин муос, мас оҥоһуктарын уонна Ольга Петровналыын бииргэ үлэлээбит кэмнэрин кэпсиир хаартыскаларын, оччотооҕу кэм куруһуокка сылдьыбыт оҕолор хаартыскаларын туруорда. Быыстапкаҕа педагог Надежда Абрамова 1989 сыллаахха турбут “Белый олень” остуоруйа геройдарын көстүүмнэрин эскиһынан уруһуйдаабыт открыткаларын туруорда. Быыстапканы кытта фойеҕа телевизорга араас кэмнэргэ уһуллубут тэрээһиннэр видеолара, “Ыҥырар угуйар оҕо саас” документальнай киинэ о.д.а. көһүннүлэр.
Киэһэ 17.00 чаастан “Возвращение белого оленя» музыкальнай остуоруйа көрөөччү биһирэбилигэр таҕыста. Остуоруйаны Абаҕатааҕы театр режиссера Евгения Попова туруорда. Музыкатын оҥордулар Василий Татаринов, Косиор Карманов, үҥкүүлэри туруордулар хореографтар: Марианна Ефимова, Кюннэй Нестерева «Сир симэҕэ» үҥкүү ансаамбылын салайааччылара, Мария Слепцова, Ньургуйаана Новикова «Амма чэчирэ» ансаамбыл педагогтара, Светлана Новикова “Чакыр оһуордара” үҥкүү ансаамбылын салайааччыта, Анжела Филиппова “Дьулусхан” үҥкүү ансаамбылын салайааччыта. Көстүүмнэри эскизтээтэ Ньургуяна Колосова, тиктилэр Айар сайдыы киин директора Иванна Шестакова, педагогтара: Марианна Ефимова, Күннэй Нестерева, Надежда Абрамова, Мария Спиридонова, Сахаяна Харитонова, Валентина Иванова, Ньургуйаана Новикова, Сахаяна Тихонова, костюмер Матрена Новикова, Чакыртан иистэнньэҥ Алексеева Матрена Иннокентьевна Чакыр оһуордара ансаамбыл оҕолорун төрөппүттэрин кытта, Сатаҕайтан Анжела Филиппова “Дьулусхан» ансаамбыл төрөппүттэрин кытта, Соморсунтан педагог Сардаана Борохина. Атрибуттары оҥордулар: педагогтар Илья Артемьев, Сардаана Уваровская, Дария Ефремова.
Сүрүн оруоллары толордулар: Сардаана — Дарина Стручкова Абаҕа орто оскуолатын 8 кылааһын үөрэнээччитэ, Амма Куо — Настя Черноградская М.Н. Жирков аатынан музыкальнай колледж 4 курсун студентката, Тимир Дьигистэй — Савелий Томскай Амма 1 орто оскуолатын 8 кылааһын үөрэнээччитэ, Айыы Умсуур удаҕан – Диана Спиридонова Сатаҕай орто оскуолатын 8 кылааһын үөрэнээччитэ, Кыыс кыскыйдаан — Сайаана Фелегонова Амма 1 орто оскуолатын 8 кылааһын үөрэнээччитэ. Остуоруйаҕа уопсайа 130 оҕо кыттыыны ыллылар.
Үбүлүөйүнэн сибээстээн тэрилтэбит историятын уонна билигин үлэлии олорор куруһуоктар үлэлэрин кэпсиир «Радуга творчества» диэн кинигэни “Айар” издательствоҕа 40 экземпляры таһаартардыбыт. Кинигэни бэлэмнээн таһаардылар дириэктэри иитэр үөрэтэр үлэҕэ солбуйааччы Феврония Данилова, методистар Александра Егорова, Вероника Давыдова, Анна Прибылых ХИФУ “Немецкая филология” салаа старшай преподавателэ.
Тэрээһин үөрүүлээх чааһыгар киин педагогическай уонна техническэй үлэһиттэригэр араас таһымнаах наҕараадалар туттарылыннылар.