Бүгүн Российскай Федерация уонна Саха республикатын культуратын үтүөлээх үлэһитэ Саха республикатын үөрэҕириитин, айылҕа харыстабылын туйгуна, хатыламмат кэрэ куоластаах ырыаһыт, методист, педагог Ольга Иванова Сидоркевич төрөөбүтэ 88 сыла.
Ольга Петровна 1932 сыллаахха Соморсун Арыылааҕар Петр Яковлевич уонна Вера Романовна Ивановтар дьиэ кэргэттэригэр соҕотох оҕонон төрөөбүтэ. Оҕо сааһа Соморсуҥҥа ааспыта. Ийэлээх аҕата эрдэ өлөннөр тулаайах хаалбыта. Кини айар талаана оҕо сааһыгар биллибитэ. Бастакы ырыатын аҕатыгар “А5абар” диэн ырыаны анаабыта. 1944 сыллаахха Амма ыһыаҕар ыллаан бар дьонун уйадыппыта, кэрэ куолаһынан сөхтөрбүтэ. Оскуолатааҕы оҕо сааһа 1939 сылтан Соморсуннааҕы оскуолаттан саҕаламмыта. Оскуоланы 1948 с. Аммаҕа бүтэрбитэ. 17 сааһыттан үлэтин биографията саҕаламмыта. 1949 с. Соморсун ааҕар балаҕанын сэбиэдиссэйэ, 1950-56 сс. Абаҕа кулуубун сэбиэдиссэйэ, 1956 сыллаахтан Амматааҕы оройуон кулуубугар уус-уран салайааччынан ананар. 1957 сыллаахха Саха ыччатын уонна устудьуоннарын маҥнайгы фестивалларыгар Ольга үөоэнээччилэринээн Люда Лыткиналыын уонна Илья Неустроевтыын “Доҕоруом, ыл кэлиий”, “Быттык-быттык Маарыйабын” ырыалары толорон лауреат үрдүк аатын ылаллар. Бу күрэххэ кыайан Аан дойдутааҕы ыччат фестивалыгар кыттар чиэскэ тиксэллэр. 1957 сыллаахха Дьокускайдааҕы музыкальнай училищеҕа теоретико-композиторскай отделенияҕа үөрэнэ киирэр. Ольга Иванова айар талаанын арыйыыга учуутала Гран Абрамович Григорян улахан оруоллаах. 1958 сылтан П.А.Ойуунускай Саха драмтеатрын концертнай – эстраднай бюротугар үлэлии кэлбитэ. Эстрадаҕа 9 сыл үлэлээбитэ. 1969 сылтан 1980 сылга диэри Амма кулуубугар режиссерунан, методиһынан, кэлин директорынан айымньылаахтык үлэлээн ааспыта. 1974 сыллаахтан эбии үөрэхтээһин педагогунан оҕолору ырыаҕа, тойукка үөрэппитэ. 1980 сыллаахха Пионердар дьиэлэрин директорынан ананар. Кини салайааччы, режиссер, худуоһунньук , мелодист, поэт, хареограф уонна ырыаһыт быһыытынан дэгиттэр талаана барыта түмүллэн “Амма чэчирэ” оҕо ансаамбылын тэрийиитигэр чаҕылхайдык көстүбүтэ.
Ансаамбыл үлэтэ-хамнаһа, ситиһиилэрэ республика, Бүтүн Сойуус үрдүнэн киэҥник биллибитэ. Оҕолор ыллыыр, үҥкүүлүүр уонна да атын дьоҕурдарын сайыннарарыттан ордук эбиитин кинилэри общественнай үлэҕэ кытыннарара, саха норуотун сиэрин-туомун тутуһарга, айылҕаны харыстыырга үөрэтэрэ.
Алтынньы 17 күнүгэр 2007 сыллаахха Оҕо айымньытын дьиэтигэр О.П.Иванова-Сидоркевич аата иҥэриллибитэ.
Балаҕан ыйын 10 күнүгэр 2011 сыллаахха Ольга Петровна бюһэ үөрүүлээх быһыыга – майгыга туруоруллубута. Бюһу архитектордар Виктор Михайлович Федоров уонна Семен Прокопьевич Прокопьев проектарынан оҥоһуллубута.
Ольга Петровна 20 үйэ чулуу киһитэ. Кини олорбут олоҕун, айар үлэтин, тапталлаах Амматын дьонугар-сэргэтигэр, кэлэр кэнчээри ыччатыгар уонна бүтүн сахатын норуотугар анаабыта.